Dimanĉon la 19-an de Oktobro, 2025, kvar ŝtelistoj rompeniris la faman francan muzeon la Luvro kaj post malpli ol ok minutoj eliris forportante ok historie gravajn juvelojn kun valoro de 88 milionoj da eŭroj. Inter la ŝtelitaj juveloj estas kelkaj de Eugenia de Montijo, edzino de Napoleono la tria, kaj de la reĝino Marie-Amelie. Post la rompŝtelo, la ministo pri kulturo malakceptis la demision de la direktorino de la muzeo, Laurence Des Cars.

La muzeo restis fermita ekde la ŝtelo ĝis merkredo matene. Detektivoj ankoraŭ serĉas la ŝtelistojn, kredante ke ili laboris por deliktiva bando. DNA troviĝis sur kasko kaj ganto postlasitaj de la ŝtelistoj, kaj la polico esperas, ke ĝi ebligos la trovon de la juveloj.

Rachida Dato, la franca ministro pri kulturo, rifuzis agnoski, ke temas pri manko en la sekurecaj sistemoj de la muzeo. Emmanuel Macron tamen alvokis al pli rapida modernigo de la sekurecaj rimedoj. Ankaŭ Des Cars deklaris antaŭ la senato, ke la muzeo bezonas tujan ĝisdatigon de sekureco.

Madagaskara prezidanto Andry Rajoelina fuĝis el la lando lundon post manifestacioj, al kiuj aliĝis parto de la armeo. La antaŭa tago, li avertis, ke oni celas puĉon kontraŭ li. Lia nuna loko estas nekonata, sed laŭraporte li fuĝis per franca militistara aviadilo.

La manifestacioj komencis la 25-an de septembro pro interrompoj en akvaj kaj elektraj servoj, kaj temas pri plendoj pri malriĉeco kaj korupto ĝenerale. Manifestaciantoj postulas la demision de la prezidanto, kiu rifuzis tion en fejsbuka elsendo el sia kaŝita loko lundon.

Je la fino de septembro, la Alta Komisaro de la Unuiĝintaj Nacioj pri Homaj Rajtoj raportis, ke 22 homoj mortis en la manifestacioj, parte pro la respondo de sekurecaj fortoj de la Madagaskara registaro.

Oni komparas la manifestaciojn al la lastatempaj okazaĵoj en Maroko kaj Nepalo. La manifestacioj en ĉi-lasta lando sukcesis forpeli la ĉefministron.

Post du jaroj de milito ekde la atako fare de Hamas je la 7a de Oktobro 2023, la 20 restantaj vivaj ostaĝoj revenis al Israelo. Interŝanĝe, laŭ la pacakordo, Israelo liberigis preskaŭ 2000 militkaptitojn kaj aliajn palestinajn malliberulojn. Laŭ la akordo, Hamas ankaŭ devas redoni mortintajn ostaĝojn, sed hodiaŭ liveros la korpojn de nur 4 el la 28 mortintoj, kiuj ankoraŭ restas en Gazao. Israelo diras, ke Hamas rompas la akordon pro tio, tamen pasintsemajne la Israela registaro agnoskis la eventualan malkapablon de Hamas trovi kaj liveri la korpojn de ĉiuj.

La usona prezidanto Donald Trump parolis antaŭ la Kneset—la Israela parlamento—okaze de la efektivigo de la pacakordo. “Israelo, kun nia helpo, gajnis ĉion eblan per perforto de armiloj. Vi venkis” li diris. En la parolado, li ankaŭ alvokis al la prezidanto de Israelo, Isaac Herzog, ekspedi pardonon al ĉefministro Benjamin Netanyahu, kiu alfrontas longdaŭran akuzojn pri korupto.

Viro nudiĝis kaj ekurinis sur altaron en la Baziliko de Sankta Petro en Vatikanurbo vendrede. Li estis rapide kaptita kaj forgvidita de vatikanaj ĝendarmoj. La okazaĵon spektis granda nombro da ĉeestandoj, kaj filmo disvastiĝas en sociaj retoj. Oni mencias similan okazaĵon en 2023, kiam polo nudiĝis sur la altaro kun la mesaĝo “savi infanojn de Ukrainujo” skribita surdorse.

Italaj novaĵfontoj raportas, ke la Papo Leono la 14-a estis “sokita” pro la novaĵo. La afero okazigos eventuala ĉesigo de publikaj diservoj en la loko laŭ kanona juro (vidu kanonon 1211), ĝis (verŝajne baldaŭa) pentofara rito. Oni ja faris tian riton post la okazaĵo en 2023.

Je dimanĉo ankoraŭ mankis komento de la novaĵoficejo de la Sankta Seĝo, kaj ankaŭ informoj pri la aresto de la viro kaj eventuala kriminala proceso.

Lastatempaj streboj starigi bonajn diplomatiajn rilatojn inter Pakistano kaj Afganujo trovis obstaklon en reciprokaj akuzoj ĉi-monate: Pakistano plendas, ke Afganujo subtenas la Pakistanan Talibanon, kaj pasintsemajne, Afganujo plendis, ke Pakistano perfortis ĝian suverenecon per bombado de Kabul kaj de bazaro en la provinco Paktika. La disputo atingis novan stadion pasintnokte per landlima batalo.

Afganujo deklaras, ke ĝi mortigis 58 pakistanajn soldatojn en la landlima malpaco, dum la pakistana militistaro anoncas, ke 23 el iliaj soldatoj estis mortigitaj kaj 20 estis vunditaj. Pakistano ankaŭ asertas, ke ties militistaro sukcesis mortigi pli ol 200 talibananojn kaj aliajn batalantojn. Laŭ Afganujo, nur 9 talibanaj soldatoj mortis. Afganujo nomis sian operacon “sukceso”.

Irano alvokis la landojn al “memregado” kaj aliaj islamaj landoj esprimis maltrankvilon pri la situacio.